Яна пільнуе
Калі не на кожным кроку
То амаль на кожным скрыжаванні
Цемры і святла святла і цемры
Здрада радуецца
Як воўк які апусціў у палонку хвост
І ловіць рыбу
Здрада выспявае ў здрадніку
Як атрута ў змяі
Здрадай ратуюцца хіжыя
Як смерцю ратуюцца вольныя
Здрада як зумкая муха
Прысутнічае на тайнай вячэры
Здрада гэта трэшчына ў сасудзе
У якім збіраюцца захоўваць жывую ваду
Здрада гэта ўсмешка д'ябла
І задаволены здраднік
Атрымаўшы сваё
Ходзіць сярод нас
І вітаецца з намі
І сядзіць за адным сталом
Гаворачы нам
Што мы таксама не святыя
Здрада гэта дым над Айчынай
У якім сонца
Як пацалунак Іуды