Збор твораў у 5-ці тамах вядомага беларускага пісьменніка Піліпа Пестрака (1903—1978) — першае навукова-масавае выданне яго літаратурна-мастацкай, публіцыстычнай спадчыны. У параўнанні з папярэднім прыжыццёвым чатырохтомным выданнем новы Збор твораў больш поўны: у яго ўпершыню ўключаны некаторыя вершы апошніх гадоў, паэма «Слова пра Мінск», публіцыстычныя і літаратурна-крытычныя артыкулы, а таксама раман «Лесавічанка».
Да кожнага твора даецца адпаведны літаратурны і гісторыка-тэксталагічны каментарый. У апошнім томе змешчаны «Асноўныя даты жыцця і творчасці П. Пестрака».
Творы ў выданні размешчаны паводле жанрава-храналагічнага прынцыпу:
першы том — прадмова да выдання, вершы, паэма «Слова пра Мінск», апавяданні, аповесці;
другі і трэці тамы — раман «Сустрэнемся на барыкадах»;
чацвёрты том — раман «Серадзібор»;
пяты том — раман «Лесавічанка», публіцыстычныя і крытычныя артыкулы, «Асноўныя даты жыцця і творчасці П. Пестрака».
Збор твораў П. Пестрака падрыхтаваны ордэна Дружбы народаў Інстытутам літаратуры імя Янкі Купалы АН БССР у адпаведнасці з Пастановай Савета Міністраў БССР.