БЕЗНАЗОЎНАЕ

 

перакрутразрыўпадзел

сьмецьцекаханьнесьмерць

 

ПЕРАКРУТРАЗРЫЎПАДЗЕЛ

 

Theatron - па-старагрэцку "відоўня, відовішча" - вытворны ад theaomai - "бачыць, пазіраць". Theaomai - дзеяслоў сярэдне-залежнага стану, што літаральна значыць "бачыцца, бачыць сябе". Убачыць можна тое, што знаходзіцца вонках сябе. Каб убачыць сябе, трэба апынуцца вонках сябе, то бок выйсьці зь сябе. Суб'ект павінен зрабіцца для сябе аб'ектам, а гэта здараецца толькі ў люстры. Такім чынам выйсьце зь сябе аўтаматычна значыць апыненьне ў люстэрку. Выйсьце зь сябе вядомае таксама як чалавечая "экзістэнцыя", жаночая "гістэрыя" і духовы "экстаз". Бачыць сябе - значыць адлюстроўвацца і бачыць сваё адлюстраваньне.

Бачыць можна толькі адлюстраваньне. Так аргагізаваны чалавечы зрок. Крышталікі вачэй утвараюць люстраную дарогу сьвятла. Бязь люстра немагчыма бачыць ня толькі сябе, але і бачыць увогуле. Адбіты і не паглынуты целам прамень дасягае "люстэрка душы", і ўжо з гэтай выявай працуе розум. Ён у сваю чаргу ўяўляе выяўленае, адлюстроўваючы ўжо адлюстраванае. Знакам тым, адлюстраваньне складае саму сутнасьць зроку і любая магчымая выява і ўява - гэта адно адлюстраваньне, а любое люстра - гэта ўжо другое ці яшчэ адно люстра. Калі першае люстра ўчыняе падзел на адлюстраваньне і адлюстраванае, кожнае наступнае люстра памнажае адлюстраваньні.

Частка прамянёвай гамы паглынаецца целам, другая - адбіваецца і дасягае люстра. Адбіцьцё поўнай каляровай гамы ўспрымаецца як белы колер, яе поўнае паглынаньне - як чорны. У адрозьненьне ад усякага іншага цела люстра ня мае свайго колеру, і перадае колер адбітага сьвятла. Звычайна яно складаецца з празрыстага шкла, пакрытага якой-колечы бліскучай фарбай, чорнага з адваротнага боку. Аднак, люстэркам можа быць любая пляскатая бліскучая паверхня з глянсаванага дрэва, каменя, мэталу. Месяцовай ноччу ў люстэрка ператвараецца вада. Адным бокам яно вяртае сьвятло, другім ахоўвае цемру ад яго пранікненьня.

Убачыць люстра немагчыма. Погляд у люстэрка сустракае толькі адлюстраваньне, само люстра застаецца невідочным. Можна ўбачыць нелюстраны бок люстра, але тым самым бачыцца зусім ня люстра. У гэтай невідочнасьці люстра крыюцца адначасова і схоў, і пастка. Пашкодзіць люстра можна толькі ззаду. Зьдзіраньне бліскучай фарбы зноў ператварае яго ў празрыстае шкло. Сьпераду яго можна разьбіць, але немагчыма пазбавіць люстранасьці. Разьбіцьцё люстэрка зноў памнажае яго на мноства маленькіх люстэркаў. Зьнішчыць люстранасьць люстэрка можна адно там, дзе яе няма. Перамагчы яго можна толькі падступным ударам у нелюстраную сьпіну. Трывалае самазамкнёнае люстра робіцца непераможным.

Цемра - цень сьвятла. Супрацьстаўленьне сьвятла і цемры - гэта супрацьстаўленьне белага і чорнага, дзейнага і нядзейнага. Цемра - адначасова і вынік і нястача сьвятла, і ня толькі ня ставіць яго пад сумнеў, але й пацьвярджае яго першаснасьць. Адбіваючы сьвятло, цела стаецца перашкодай промням, і пакідае ззаду неасьветленую пляму цемры. Супрацьстаяньне сьвятла і люстэрка - гэта супрацьстаяньне сьвятла і сьвятла, дзейнага і дзейнага. Цемра, няхай як чорны колер, але ўспрымаецца зрокам, у той час як люстра пасьпяхова яго ўнікае, падсоўваючы замест сябе чужую выяву.

Перамяшчаючы выяву, люстэрка стаецца пасярэднікам, што хаваецца за пасланьнем. Адлюстраваньне ўтварае восі каардынат, на якіх само люстра займае становішча нерухомага і бязважкага нуля. Яго сутнасьць можна назваць нібытам - тым, што ёсьць няпэўна, і тым, чаго няма ў незалежным стане. Адлюстраваньне, адпачатку другаснае дзеяньне, выяўляецца стваральнікам сьвету - прасторава-часавай працягласьці, паколькі прастора і час узьнікаюць толькі зь пераадоленьнем адлегласьці. Невідочным гаспадаром гэтага сьвету стаецца тое, што пераносіць сьвятло - люцыфэр.

Люстраны падзел нібыта памнажае бытуючае на два, пасьля чаго наладжвае яго вытворчасьць. Аднойчы скапіяваўшы бытуючае, ён надалей пакідае арыгінал у спакоі патэнцыі, пакрысе паскараючы выраб, тыражаваньне і распаўсюджаньне яго выяваў сярод наступных люстэркаў. Адлюстраваньне робіць бытуючае быцьцём, цалкам магчымым, але неверагодным. Нерухомасьць быцьця ператварае яго ў нерухомую маёмасьць жвавага небытуючага, якім для люстэрка стаецца перамяшчальнае адлюстраваньне.

Люстра падзяляе бытуючае на яву і яе выяўленьне, то бок стварае не зусім бытуючае ці зусім небытуючае. Актыўнасьць выяўленьня робіць яго больш падобным на яву, то бок нават большай явай за яву. Чыннасьць экзістэнцыі робіць яе больш падобнай на бытуючае за быцьцё, якое ў выніку сваёй зьнерухомленасьці абвяшчаецца нябытам. Дзейнае небытуючае падмяняе бытуючае. Адлюстраваньне непазьбежна падмяняе адлюстраванае таму, што больш на яго падобна.

Люстраны зрух упершыню ўчыняе адрозьненьне дзейнага і нядзейнага, разрываючы кола сьвятла на трыяду суб'екта, прэдыката і аб'екта. Да зьяўленьня на шляху сьвятла люстэрка бытуючае зьяўляецца самазамкнутым колам сьвятла. Уласна, да сустрэчы зь люстраной перашкодай ёсьць адно бытуючае, і бытуючае ёсьць суцэльным сьвятлом. Бо суцэльная цемра - папросту нябыт, а асьветленая цемра зьяўляецца ўжо ня цемрай, а сьвятлом. Калі ёсьць сьвятло, няма цемры, і адпаведна калі няма сьвятла, няма нічога. Суцэльнае сьвятло "ёсьць" несьвядома, само па сабе, ніяк не супрацьстаўляючыся цемры. Калі прамень не сустракае перашкоды, цемра ня мае ніякага шанцу ўзьнікнуць. Цемра стаецца пасыўным аб'ектам сонечнага ўдару толькі абароненая люстрам, і ні ў якім разе не зьяўляецца ім адпачатку.

Да зьяўленьня люстэрка ўсё ёсьць адно сабой, што тым ня менш ня бачыць сябе, паколькі бачыць можна толькі адно аднаго. Такі першасны стан у наяўнай люстраной множнасьці можна прыблізна перадаць аднавымернай стужкай мёбіўса, якая мае ўсяго адну паверхню. Для зьяўленьня люстэрка стужка павінна сьпярша разарвацца, для чаго ў сваю чаргу неабходны яе перакрут. Разрыў стужкі мёбіўса ўтварае яе двухвымернасьць, выяўленую роўніцай. Нават больш за тое, разрыў разгортвае чатырохвымернасьць, утвараючы дзьве паверхні адной стужкі. Белы бок разарванай стужкі стаецца сонцам, крыніцай сьвятла, якая з усёй сілай выцягвае чырвоныя промні да адваротнага, чорнага боку стужкі. Архітэктура сьвятла набывае свой прэдыкат у выглядзе руху сьвятла, і аб'ект у "асобе" цемры.

Да зьяўленьня люстра няма ні прасторы, ні часу, якія ўзьнікаюць толькі як вынік адлюстраваньня. Таму ўзьнікненьне люстра зьяўляецца адначасова як самім чынам, так і яго прычынай ды вычынам. Усякае пытаньне пра прычыну і мэту мае наўвеце часавую пасьлядоўнасьць і прасторавую працягласьць. Тым часам толькі чын люстра стварае саму магчымасьць запытаньня яго прычыны. Кожнае такое пытаньне можа мець адназначным адказам толькі само люстэрка. Усе падзеі люстра ўчыняюцца разам і адначасова, толькі сваім зьдзяйсьненьнем ствараючы аддаленасьць.

Люстэрка ўтвараецца зь пераніцаваньнем тканіны мёбіўсавай стужкі, калі рух сьвятла нечакана сустракаецца сам з сабой. Цемра паварочваецца да сьвятла сваёй бліскучай сьпіной, нанова спалучаючы стужку, але ўжо аднолькавымі канцамі. Такім чынам утвараецца бел-чырвона-белая сымэтрыя, якая кідае сьвятло ў люстраную вязьніцу. Падваеньне сьвятла тым самым удвая ўзмацняе сьвятло. Двойчы белае люстра ўдвая падобней на сонца і ўдвая сьвятлей за яго. Канцы стужкі злучаюцца, на гэты раз размыкаючы паверхню суцэльнай цемры і паверхню суцэльнага сьвятла. Сьвятло пачынае шалёна матляцца ў заганным крузе, бясконца адбіваючы сябе сабой, шукаючы выйсьце на другі бок сябе.

Зь першым перакрутам люстра разрывае мёбіўсаву аднавымернасьць, і тым самым разгортвае двухвымерную паверхню. Наступны перакрут двухвымернасьці расьсьцілае дываны вэртыкалі і гарызанталі. Так званы трохвымерны сьвет зьяўляецца насамрэч чатырохвымернай раскруткай адлюстраваньня аднавымернасьці. Вэртыкальны і гарызантальны перакрут утвараюць зман глыбіні таго, што ня мае нават працягласьці. Першы люстраны перакрут зьяўляецца найперш раскрутам роўніцы. Кожнае наступнае люстра, перакручваючы яе бакі, толькі замацоўвае гэты падман.

Мяняючы месцамі правы і левы, або верхні і ніжні бакі, другі перакрут тым самым замацоўвае ня менш зманлівую сапраўднасьць першага раскруту прасторы і часу. Перакручваючы верхняе і ніжняе, люстры вачэй насамрэч гэтым і ствараюць іх супрацьстаўленьне. Перакручаная дагары нагамі выява яшчэ раз адбіваецца, цяпер ужо люстрам рацыі, якое, вяртаючы вэртыкаль у "ранейшае" становішча, ня толькі стварае новы падман, але і спраўджвае стары. Немаўля бачаць сьвет перакуленым. Такое самае ўзьдзеяньне маюць некаторыя галюцынагены, што перапыняюць рацыйную працу. Таму зрок абавязкова ёсьць падманам зроку.

Малпа сьвятла спрабуе заняць яго месца. Першапачатковая нядзейнасьць люстра, якое толькі адбівае, але не выпраменьвае сьвятло, у выніку абяртаецца яго вычваральнай дзейнасьцю. Узьнікненьне люстэрка на шляху сьвятла выкрадае ролю суб'екта ў яго крыніцы. Выпраменьваньне з прэдыката ператвараецца ў аб'ект адлюстраваньня. Адлюстраванае сьвятло стаецца адсьветам, прэдыкатам новай канструкцыі. Яе новы суб'ект хаваецца за бліскучай глянсаванай паверхняй. Але ў выніку пераламленьня простай дарогі сьвятла свайго лёсу ўнікае менавіта яго немінучы аб'ект - цемра.

Цнота і таямніца сапраўднай цемры не парушаюцца зрокам. Чорны колер - гэта ўжо колер яе паразы. Роўніца люстра, застаючыся невідочнай і бескаляровай, выяўляецца адзіным сховам цемры і хітрай пасткай для сьвятла. Цемра робіцца ўсюдыпрысутным і ўсёнапаўняючым богам адлюстраваньня, адсьвет якога насамрэч абяртаецца яго адценьнем. Новы суб'ект стварае сьвет ex nihilo, якім для яго стаецца былое бытуючае, быцьцё. Бог стварае сьвет, але сам не зьяўляецца яго часткай. Богазьяўленьне ў стварэньні можа абярнуцца толькі ягонай сьмерцю. Вось таму ён і прымае толькі адмоўнае багаслоўе.

Theos - па-старагрэцку "бог" - як і theatron вытворны ад theaomai - "бачыць". Theos мадыфікуе той самы корань, што і лацінскае deus, санскрыцкае deva, славянскае дзіва. Theaomai адсюль літаральней перакладаць як "дзівіцца". Зьдзіўляе ня так падман існаваньня адлюстраваньня, як яго перайманьне адлюстраванага. Бытуючае ня дзівіць сваёй сапраўднасьцю, бо дзівіць яшчэ няма каго. Экзістэнцыя зьдзіўляе дзейным падабенствам на бытуючае. Дзіва дзейнага небытуючага ёсьць толькі адлюставаньне нядзейнага бытуючага. Зьзяньне сапраўднага аблічча вяршыні алімпійскага пантэону Дзія - а старагрэцкае Zeus, Dios узыходзіць ізноў да таго самага кораню - спапяляе Сэмэлу, маці Дзіоніса.

Нараджэньне дзіва супадае зь люстраной сьмерцю сьвятла. Маленькія дэвы адразу ўчыняюць "самазабойства" Бога, вядомае як ахвяраваньне пурушы: зьдзяйсьняючы замах на бацьку, яны выходзяць зь ягонага цела. Экзістэнцыя пакідае бытуючае быцьцём. З трупа забітага Роду дэвы ствараюць свой сьвет, па чарзе ўваходзячы ў яго, і спрабуючы ссунуць зь месца. І толькі вятраньне дыху ажыўляе нябожчыка, завяршаючы нэкрамантычны рытуал. Дзіўны новы сьвет уяўляе сабой зомбі, адухоўлены труп, жывую нежыць. Лацінскае lustrum азначае ачышчальнае ахвяраваньне, зьвязанае з абвядзеньнем вакол пашы ці войска ахвярнай жывёлы.

Вэдыйскія асуры, старэйшыя браты і ворагі дэваў, вызначаюцца тым, што не ахвяруюць. Пра гэта ўласна гаворыць імя asura. Часьцінка "а" мае адмоўнае значэньне. "Sur" аднакарэннае Surya, богу Сонца, і ўзыходзіць да першаснага кораня, складзенага з зычнага і санорнага. Яго праявамі ў сучаснай мове зьяўляюцца такія карані як "гр", "жр", "зр", "зл", сэнсава зьвязаныя з агнём (гарэць, жар, зала), бачаньнем (зрок, зерыць) і ахвяраваньнем (жрэц, жэрці, жэртва). Такім чынам, asura - літаральна "не-гр" - поўная супрацьлегласьць зроку: сьвятлу як адлюстраваньню сьвятла. Авэстыйскія агуры, наадварот, увасабляюць першаснае, далюстраное, сьвятло і вагонь, адлі спаганеныя і перакручаныя дэвамі. Агура-мазда стварае сьвет, але яго адразу псуе ліхі Ангра-ман'я: гэты сюжэт паўтараецца далей нязьменна безьліч разоў.

Адлюстраваньне - адначасова ахвярная сьмерць сьвятла і нараджэньне дзіўнага адсьвету. Цемра забівае сьвятло, прыкрываючыся люстэркам, якое, адылі, зноў адбівае яго ў цямрэчу. Таму, каб застацца неасьветленай, яна павінна зноў і зноў ахвяраваць сьвятло, падстаўляючы пад адсьвет кожнага разу новае люстра. Забіваючы сьвятло, люстра тым самым зноў і зноў нараджае яго ў адсьвеце, які зноў пагражае цемры асьвятленьнем. Забітае бытуючае ўцелясьняецца экзістэнцыяй у быцьцё, адпачатку чакаючы на новую сьмерць і новае нараджэньне. Уцякаючы ад сьвятла, цемра стварае па сабе люстраную блукальню, доўжачы заганны круг нараджэньня і сьмерці.

 

СЬМЕЦЬЦЕКАХАНЬНЕСЬМЕРЦЬ


Адзінае канчаткова падзеленае на два. Маўленьне больш не азначае драбленьне ўсяго на часткі, і далейшы іх распадзел на часьцінкі. Матэрыя надалей ня дзеліцца на малекулы, якія ня дзеляцца на атамы, а тыя ў сваю чаргу - на ядры, электроны, і г. д. Адзінства і непадзельнасьць цела і духа далося малой крывёй, ці нават безь яе.

Пастаўленае некім раней цяпер трывала стаіць на сваіх гліняных нагах, і ставіць само сябе. І няма таго, хто можа яго зваліць, ці хаця б убачыць яго падзеньне. Замста бытуючага сталася чыннай наяўнасьцю небытуючага. Пастухі ў капшуках сусьветнай павуціны. Дом, перабудаваны ў вязьніцу, зь якой павыганялі зьняволеных.

Дзень незалежнасьці машыны не сьвяткуецца на дзяржаўным узроўні. Шрубы і поршні, правады і паўправаднікі ўсьвядомілі сваю непаўторную індывідуальнасьць. Жыцьцё адданае стараннай перадачы энэргіі ўдзячным аднаразавым плястыкавым нашчадкам. Расклад руху цягнікоў як усьвядомленая неабходнасьць, свабода.

Нічога і нікога не існуе. Існаваньне ня проста страціла сэнс, але рашчынілася ў актыўна небытуючым, і ня ёсьць болей ніяк. Сэрыйныя думкі, пацалункі, мэбля, адзежа, паставы і мігі цела. Глябальны полавы акт, які паўтараецца ў любым часе і месцы, ў любой форме, заўсёды тоесны сам сабе.

У свой час бытуючае паставіла, і вось ужо бог з канвэера. Небытуючае стварае сусьветы з шалёнай хуткасьцю, лёгкасьцю і размахам, абставіўшы бога ня якасьцю дык колькасьцю. Атрымліваецца пакуль што надзіва квадратна. Хаця поступ - відавочны, няма сумневаў, што колькасьць кропак на цалю можна павялічваць бясконца.

Штучныя бытуючыя нічым ня розьняцца ад натуральнага, натуральнасьць якога даўно пад пытальнікам. У жанчыну ў нумаральным фармаце можна закахацца, зь ёй можна пераспаць, ажаніцца, і шчасьліва пражыць увесь засталы час. Ёй можна прысьвячаць элегіі, оды, лісты.

Між тым бытуючае завалена сьмецьцем, экскрэмэнтамі, памыямі і выкідамі небытуючага. Утылізацыя і перапрацоўка ўтылю павінны праходзіць як мага больш незаўважна. Бясконцая рэінкарнацыя адкідаў з мэтай зрабіць момант выкіду і працягласьць ляжаньня ў полі зроку найкарацейшымі.

Небытуючае вызначае сьвядомасьць. Бытуючае не вызначае небытуючага, г.зн. не вызначае нічога.Досыць. Мастацкі чын сусьветаў не стварае. Сусьветы ствараюць багі і машыны. Нічога мастацкага ні ў першым, ні ў другім выпадку не адбывалася, не адбываецца, і не адбудзецца. Творчасьць небытуючага вывучаецца ў школах, унівэрсытэтах, шырока асьвятляецца ў прэсе, каталягізуецца і захоўваецца ў музэях.

Змагацца з машынай ня тое што немагчыма, проста няма каму. Любыя спробы бунту і супраціву яна скарыстоўвае. На сваю карысьць, натуральна. Больш за гэта, бунт, супраціў сталіся асноўным мэханізмам самапастаўленьня. Змаганьне з машынай празь небыцьцё ёю - бязглузьдзіца, бо яна - ўрэчаісьненае небытуючае.

Мастацкі чын не вызначаецца месцам і часам, але адбываецца ў канкрэтным месцы, не пазначаным на мапе, і ў канкрэтным часе, на якім не спыняюцца стрэлкі гадзіньніка. Любыя пошукі і чаканьні вырачаныя на паразу. Усе сьведкі гавораць адно, і значыць - хлусяць. Між бытуючым і машынай назаўжды кастанэдавы прыцемкі.

Небытуючае закормлена вобразамі і архетыпамі. Вочы Вія да апошняй хвілі былі заплюшчаны. Набліжаецца новае адкрыцьцё рэчаіснасьці, хоць праўдзівей - першае. Уздымаюць ягоныя веі, і ўся сукупнасьць шкляных перлінаў тупа зерыць на спустошаны краявід. У зрэнках люструецца зімная памежная шэрань, і хіба ад холаду веі могуць самкнуцца зноў.

Жыхары былой імпэрыі настальгуюць па будучыні. Чыстыя вуліцы і памытыя муры, дагледжаныя дарогі, пацалункі ў хмызах, збудаваныя вочкі і помнікі вечна жывым паэтам. Добра схаваныя ў скуру гмахаў каналізацыйныя трубы насамрэч пакрысе пераходзяць у вадаправодныя.

Горад трэба бачыць гадзіне а чацьвертай. Вецер гоніць па зяблай асфальтавай пустэльні бязладныя рэшткі газэтаў, плясмасавых шклянак, луску трапічных фруктаў, скарыстаныя прэзэрватывы. Праз гадзіну зьяўляюцца санітары грамадзтва і вымятаюць сп'янелыя целы.

Небытуючае робіць сьмецьце, гвалт, сэкс больш чым відавочнасьцю, больш чым цэнтрам увагі, больш чым дэкарацыяй дзеяў. Нібыта прапускаючы іх у зданьнёвы цэнтар сваёй бесхрыбетнай структуры, яно насамрэч іх лягчае і ўтылізуе, робіць бясшкоднымі і незаўважнымі. Наданьне нобэлеўскай прэміі, ушанаваньне памяці пісьменьнікаў ёсьць ужо спосаб ня проста архівацыі паэзіі, але яе перапрацоўкі.

Плянавая зачыстка мясцовасьці, групавуха, экалягічная катастрофа на экране — гэта нешта зусім адрознае ад забойства, скляшчэньня і нафтавага возера як падзеяў бытуючага. Сэнс ня проста наліваецца ў келіх нонсэнсу, але цячэ церазь ягоны край і памнажаецца да бясконцасьці як аб'ект для аматарскай відэакамэры.

Мастацкі чын выкідае з машыны і закідае назад у бытуючае пры паўстаньні і пры ўспрыманьні. Першая і другая падзеі абсалютна тоесныя адна адной, і значыць - адно. Нават калі гэта штучнае бытуючае з сэрыйным нумарам і сэйвамі ў адпаведнай дырэкторыі. Вочы Вія, адплюшчаныя ў "Might and Magic VII". 

Вышэйпамянёныя амаль заўжды - каляровыя ксэракопіі "сапраўднасьці" - завалены сваім віртуальным брудам, там направа і налева разьлятаюцца забітыя, і дзяўчата шырока рассоўваюць ногі. Няма прынцыповай розьніцы. Гэтае сьмецьце выклікае нешта дужа падобнае на тое, што цягне за сабой зьняісьнены арыгінал - нішто.

Бытуючае - адно, і небытуючае ўжо таксама - адно. Вынік мастацкага чыну заўжды адзін. Хуткасьць асацыяцыі непараўнальна большая чым кліканьне мышкай па падкрэсьленых слоўцах. Тэкст скерзаны на трохі вышэйшым узроўні, чым набор і аўтаматычнае распазнаваньне накрэсаў, пісаньне направа, налева, ўгору і долу, крывёй, малаком або конскім гноем. Падмена радзімы.

Быць - дзеяслоў дужа пераходны. Каб чыніць хоць-што, трэба сьпярша гэта быць. Праца, прафэсійная дзейнасьць - толькі шум пракручваньня колаў небытуючага, жыцьцё. Чын жа - калі ўначы недалёка ад рэек на скелзе, заваленым жарствай, чуваць гэты гук, відзён яго цень, і баліць зламаная ў падзеньні рука. Мастацкі чын вымагае працягласьці бытуючага і ўгрунтаваньня ў ім.

2.
Вось пакаленьне, багатадасьведчанае яшчэ не пражытым жыцьцём. Статак юных старцаў са слоганам: усё было. Як безумоўны рэфлекс, імгненная першая рэакцыя, адразу, у той жа момант, калі ў поле зроку трапляе хоць штосьці ўчыненае - загадзя палічанае цытатай зь непрачытанай кнігі. Вайна яшчэ не абвешчаная, але ўжо падпісаная капітуляцыя.

Бытуючае было, мінула, і ёсьць адно ў мінулым часе. Бытуючае ўжо былое, і гэтым небытуючае. Выкінутае на сьметнік, на які какетліва навесілі шыльду "музэй", і гэтым яны зраўнаныя. Ня замста, але выкід, адваротны праект бытуючага ў мінуласьць, што паўтараецца безупынна, як толькі яно зноў зьяўляецца, бо ня можа не зьяўляцца. 

Вярнуць краіну ў мінуласьць значыць вярнуць яе ў бытуючае, то бок націснуць понаж у кабіне самазвала і вытрахнуць яе на звалку. Адраджэньне - тое самае што бамжаваньне. Вяртаньне бытуючага азначае хаджэньне па сьметніку і проста цудоўнае знаходжаньне некранутай аўтэнтычнасьці нядаўна скарыстаных крывіцкіх прэзэрватываў, падрапаных гэльскіх кампактаў, пажаваных ліцьвінамі гумак, каб спажыць іх яшчэ раз і натуральна, нанава выкінуць.

Мастацкі чын ужо ўтварае паражнечу, а не запаўняе яе, і патрабуе ўжо не пакутаў, а сьмерці. Кахаючы павінен крочыць утропы каханьню й каханаму. Выпадаць з кузава самазвала на дно, і праходзіць усё кола перапрацоўкі другаснай сыравіны, каб ізноў быць спажытым. І хай перліны гуляюць самі з сабой, Кнэхт ня можа не ўваскрэснуць, патануўшы ў мазутнай сажалцы.

Калі пост прыядаецца спажыўцам, можна яго пахаваць. Але кожныя яго хаўтуры - толькі нараджэньне новай гандлёвай маркі старога добрага найнеабходнага тавару і падсілкоўваньне фальшывай размаітасьці рынку. Эстэтычны зрух немагчыма ўтылізаваць толькі таму, што ён проста не фіксуецца фотаэлеэмэнтамі плясмасавага сьвету.

Калі раней праект быў проста адкладаньнем бытуючага на пасьля, то цяпер, калі пасьля засталося ззаду, праект - ужо адкіданьне бытуючага ў цёмнае ўчора, і закіданьне ў сьветлае заўтра небытуючага. Апыненьне па-за праектам - ужо ня простая адмова ад выкананьня пяцігадовага пляну.

Экалягічная рэторыка пакліканая як легітымацыя ўтылізацыі, як спроба машыны зрабіць вечнай хісткую раўнавагу новага парадку. Невідочныя зялёныя свастыкі на штандары эўрапейскай супольнасьці. На экскрэмэнтальнай багне будуецца глябальны пэтэрбург. Падваліна гэтай хаты раней ці пазьней збуцьвее, і сыты залаты мільярд захлынецца ў сваіх спаражненьнях.

Зблытаныя, ужо неразрозныя і нікому не прыналежныя культурныя парадыгмы, новая бабілёнская вежа, што ўвесь час будуецца і разбураецца самымі будаўнікамі. Калі істота панкавай эстэтыкі ў выпадзеньні з праекта, дык мэтапанкавы стан эстэтычна значыць адданьне расьцятасьці надвое - адначасовае быцьцё падлай, выпадзенасьцю, сьмецьцем і зьдзіўленым позіркам Вія ў сьмелую новую рэчаіснасьць.

Чым горш, тым лепш. Калі ўсе жывыя істоты кладуцца спаць, ёгін сустракае зольле. Пара атрымаць дывідэнты з пэрманэнтнага покрышу ў гэтай мясцовасьці. Ды такое становішча трэба было б скласьці, калі б яно ня склалася само.

 

  nihil #3  nihil #2  nihil #1   

   



nihil