|
КРОНІКА
Гарадзенскі Унівэрсітэт:Лабараторыя гісторыі і культуралёгііАд пачатку года распачала сваю дзейнасьць Навукова-дасьледчая лабараторыя рэгіянальнай культуры пад кіраўніцтвам Святланы Куль-Сільвэстравай. Але ўжо першыя праекты, сэмінары, канфэрэнцыі паказалі, што за сьціплай назвай хаваюцца амбітныя пляны. Каб зразумець, аб чым гаворка, варта зьвярнуцца да апошняй манаграфіі Куль-Сільвэстравай “Беларусь на мяжы стагоддзяў і культур. Фармаваньне культуры новага часу на беларускіх землях”, якая па сваёй канцэптуальнасьці апынулася далёка наперадзе традыцыйнай беларускай гісторыі падзеяў.
ЭГУ: Цэнтар Гендэрных Досьледаў У гэтым годзе (зь верасьня 2000 г.) Цэнтар Гендэрных Досьледаў разам з філязофскім факультэтам ЭГУ абвясьцілі прыём у магістратуру па гендэрным досьледам. Тэрмін навучаньня – 1 год. Выкладаюць лепшыя спэцыялісты зь Беларусі, Эўропы, Расеі, ЗША. Цэнтар Гендэрных Досьледаў - адзіны ў Беларусі на сёньня асяродак, які комплексна займаецца гендэрнымі штудыямі.
“Нідзе
і Ніхто”:
постэкзыстэнцыйныя
практыкі ў
посткаляніяльных прасторах Канфэрэнцыя будзе адбывацца ў адным зь менскіх закрытых памяшканьняў. Час і мейсца будуць канфідэнцыйна паведамленыя ўдзельнікам. Сэкцыі: 1. “Пасьля экзістэнцыі” 2. “Культуры ценю” і цывілізацыі не-існаваньня 3. “Іншае” ды калянізаваная сьвядомасьць Заяўкі на ўдзел (тэзы да 2 старонак тэксту, падпісаныя псэўданімам) можна дасылаць на адрас: Менск, 220036, пашт. скр. 24.
ЭГУ: новы філязафічны часопіс “Топос” Кожны новы філязафічны праект у Беларусі сутыкаецца ня столькі з праблемай часу (усе ўжо пагадзіліся, з скрухай альбо эйфарыяй, на існаваньне ў часе пасьля...), колькі з знаходжаньнем сябе ў той альбо іншай прасторы. Менавіта прастора выклікае пэўныя канцэптуальныя рэакцыі, і таму не выпадкова, што першы нумар “Топасу” спрабуе акрэсьліць “сваю” прастору надзвычай дакладна... Гэтая прастора можа быць апісаная трыма словамі: прафэсыяналізм, фэнамэналёгія, кантынентальная традыцыя мысьленьня.
|
|||